回望

去年10月, 公事私事兩忙, 精神一時焦躁, 一時亢奮, 累得每晚臨睡前還要在寫電郵記下第二日要完成的事, 才可安心入睡。

終於, 經歷了一段抗戰, 數場內戰, 轉眼便過了一年, 還是那些人, 還有那些悶到發慌的事, 又再重覆, 只是現在我會跟自己說, 珍惜自己的時間, 不要浪費在那些做又冇回報, 又做得唔過癮的人同事上面, 經一年間慢慢調節自己的步伐, 也再次整理一下自己曾經堅信的原則。

是的, 我曾經自命識做人, 為大局著想, 為公司著想, 為同事著想, 為朋友著想, 為自己的前途著想, 所以會為身邊的人調節自己的反應、說話、甚至思想, 先想定要的結果, 再走一步, 明明心裏不同意, 郤又先放棄自己的想法, 嘗試套入對方的立場去想, 想明白對方的心情。

於是, 我這種彈性處理的處事方式, 慢慢令我離原則遠了, 也磨蝕了自信, 因為信的都是別人所信, 做的也是別人想你做的。

我曾經以為自己在向前行, 在進步, 但又不斷思索為何自己心情起伏那麼大, 原來只是拐了一大個彎, 最根深蒂固的價值觀由懂事開始, 父母的教誨, 一直沒有改變, 現在依自己所相信的大道理去行, 每日都過得很充實很平安.

用iPhone上一堂教小孩的課

終於看完了第一套用iPhone播放的日劇 - GOLD (神級演員天海祐希+神級編劇野島伸司), 可以說是近年我覺得最好的日劇, 我用了一個星期, 在港鐵在等人在一個人食LUNCH的時候便消化了也在腦中反思了很多很多次, 怎樣教小孩才是最好的方法?

我沒有小孩, 但身邊的朋友紛紛陸續成了父母, 再回想我曾經一齊住的兩個侄仔, 教小朋友我也有經驗, 只是不以父母的身份, 但我覺得小朋友只要開始聽得明你的話, 你已經可以當他是一個懂性的人去教他, 不要當他是小孩子便百般呵護, 因為他們很快就知道 , 並且認定哪個人的話要聽, 哪個人會聽自己的話, 如果他試過一次在你身上找到好處, 很快便以同一方式在你身上找更多更大的好處, 得一想二, 得二想三, 貪得無厭, 對呀, 因為他們很單純, 只愛即時的好處, 所以會經常要求玩一陣, 唔想溫書, 想食糖, 唔想食飯, 想打機, 唔想運動, 有時我也耐不住他們可愛的樣子而鬆手了, 雖然我對他們也算嚴(對比他們的媽媽), 但他們沒有討厭我, 反而很喜歡跟我一起, 會要求同我一齊訓, 可能因為我平日沒事沒幹, 便會去抱抱他們. 小朋友當然需要愛, 但更需要有人以身教, 陪他們成長, 怎樣處事, 待人. 現在的父母, 忙得沒時間照顧小孩, 請了賓妹便一天16小時衣食住行都陪伴左右, 學到的將會是如何使喚一個工人, 親身感受到階級之分, 那這個小人仔長大後即使有再好的教育, 根深蒂固的觀念郤未必改變, 那會是一個怎樣的人?

恐懼Temo .愛TeAmo

呢排好似突然興起解讀人心的話題, 電視劇固然就是明抄the mentalist, 要揭開人心深處的秘密, 我問你答的溝通已經out, 說什麼憑4份1秒間的眼神舉止反應表情等身體語言, 即可解讀人心,你講真話定大話, 係人定係鬼, 你的舌頭再靈活, 都唔及你的身體, 坦蕩蕩讓人看個夠, 每日觀察一下身邊的人, 真係幾有趣.

今日放工趕到百老匯電影中心, 看了阿根廷電影"謎情追兇The Secret in Their Eyes" (O Segredo nos Seus Olhos), 一散場, 隨即問一下戰友的觀後感, 他說"冇乜特別......普普通通啦", 是的, 看戲是很主觀的, 100人有100種口味, 有人覺得"亞凡達"無敵好睇, 看3次都未夠, 我看後倒覺得不如睇多次"天空之城".

但這一套, 沒有峰迴路轉的劇情, 沒有嘩眾取寵的賣點, 郤令我的心情久久未能平復.

論電影, 審問疑兇跟電梯內的一幕, 節奏氣氛令人窒息; 敍事手法雖有過去與現在, 郤很清晰地交代兩個時空的因果關係, 也交代了主角感情的伏線.

在描寫二人的愛情, 沒太多對白, 郤用了很多大特寫去拍攝表情, 靜靜的對望, 用眼神跟對方說"我愛你", 含蓄得連接吻也沒發生過, 反而令那份愛在心中翻騰. 驚鴻一瞥便愛上眼前人, 即使沒有表白過的廿多年, 愛的濃度.深度, 就正正因為沒有從沒用口說過"我很愛你", 沒有語言的框架, 於是那份含蓄的愛意就像空氣一樣漫延開去. 因為害怕而不敢去愛. 誰沒試過一見鍾情, 郤害羞得低下頭? 誰沒試過看穿了對方眼中的愛意, 郤抑壓著已受觸動的自己, 不敢讓對方看到?

愛是美好的, 即使沒有開花結果,只要相信那一次對望曾經讓愛意交流, 便應好好保留,老了再回味一下年青時怦然心動的快樂, 證明沒有白活.

看完始知道這是今年oscar的外語片得獎作品, 編.導.剪都是同一人. 

曾經失去, 才懂得珍惜

我諗我比一般女仔懶於行街shopping, 唔係有目標要買野係千萬個唔願花時間去window shopping的人, 倒轉來說, 如果是大班人冇野做去行下我又通常都唔買唔甘心, 但自從跟同事試過一齊網購之後, 真係諗過從今之後買乜衫都上網, 就可以省下更多時間, 仲又平又唔怕咁易撞款.

殊不知, 因為膝痛的關係, 3個禮拜中行路的時間比上廁所還要少, 今天竟然可以行足2個半鐘冇停過, 唔俾人打電話催我走都未知天都快黑了. 原來能夠暢快的行行行, 想去邊就去邊, 係好幸福好痛快的一件事, 心情自不然好, 更好的是買到呢個冬天會令我倍覺溫暖的心頭好, 係tweed+漆皮+金屬的格仔袋, 雖然chanel style tweed已經興左唔知幾多季, 但實在punk得來太可愛了!

發人心醒

活得自在, 怡然自得, 自得其樂是我一貫追求的生活態度, 既然說得出「追求」, 就因為未能貫徹始終, 偶有活得太自在, 冇事冇幹時又覺太無聊, 於是又再自尋煩惱。

在書店中本想找1Q84, 找不著反而把整本UNCLE BEACH的「撈碧刁」看完, 其間又看了一些講思考方法及設計的工具書, 最後買了因為包到實無法打書釘的卓韻芝「你的心不是公廁」回家。

能在20分鐘內把整本「撈碧刁」看完, 因為書內字數的確少, 但能夠一口氣看完, 也因為其文字其思考確是「短小精幹」, 帶來無限聯想及會心微笑。在講求速度、效益及環保的香港, 這本書是值得我買回家, 得閒揭下, 放鬆下, 最終沒有買下是因為全書店只此一本, 給人揭到封面起皺, 唯有去下一間碰下運氣。

其中的一頁精句（大概是）：
有Title冇態度的人, 會受人鄙視 
冇Title有態度的人, 才值得人尊重

回家又看了「你的心不是公廁」內幾篇文章, 相比起她之前的散文集, 這本書中有些題目我覺得太嚴肅(竟然!), 所以先選一些感興趣的, 跳住讀, 覺得芝c姑b成熟了很多很多, 但最底果"浸"還是跟十年前沒有變過, 想做就做, 愛自己的程度有增無減, 還加多了對長輩、前輩、後輩及香港的愛。

兩個作者, 一男一女, 講自己所見所聞所思所想所悟所得, 個人得很自我, 「總之我覺得係咁」 ,讀完未必全部認同, 但起碼是從心出發的說話, 總之是看得過癮, 人生就是要活得過癮罷!

CHIPPENDALES, SO CHARMING!

有時不得不承認, 靚人的確可以令這個世界變得更美好。給這個靚仔到似電影明星的Dave抱左一下, 我就暈左幾日。

亦不得不承認, 人的口味是會變的, 看我上一篇所post的靚仔相已換了今期最紅的Dave, 因為Dave的演出實在精彩。會用眼神的人總是最charming的。

雖然已經係今年第二次到澳門開show, 應該儲到不少fans, 但估唔到星期五晚上chippendales第一晚show,竟然還有很多空位, 相信是贊助商remy martin出錢買了很多$480的飛用來送禮, 但送得俾果d客又係男人居多, 女同事又不能明目張膽在男同事面前支持呢d猛男show, 以致連第一排正中最養眼位置到開show都冇人坐, 好彩我地坐第一排, 都仲有得同chippendales近距離接觸。

現場所見, 最瘋狂的莫過於一班40+的中女, 如我呢d後生女都係想睇又唔太敢流口水, 第一次睇呢類show本來都係抱住見識見識的心態, 但surprisingly個show唔係想像中脫得咁盡, 反而在編排上很有broadway的感覺, 最鍾意「走犯」一幕, 全院熄燈, 跟住有人用電筒照照下, d chippendales就係身邊走來走去, 趁你唔覺就抱下你, 你會feel到d呼吸聲由遠至近, 加上男人的抖氣聲同女人的尖叫聲, 聽得人心跳加速。

多得同事A的投入, 成功吸引到chippendales埋身, Dave好gentleman咁抱晒我地4個坐係第一排但比較靜(亦比較靚haha)的觀眾, 咁身貼身的接觸, 先發現佢雖然全身都係汗, 但係一d汗味都冇, 仲有少少香, 又唔係Cologne 咁刺鼻, 唔怪之得d fans成日留言話佢smell nice, yummy...lol

David Abrams, aged 37

忽然傷膝

為了醫師的一句話, 我立下決心練習跑步, 同時練氣兼減肥, 3日內圍住所住的屋苑跑了兩次, 正感覺到自己體內的運動細胞要被喚醒之際, 那個膝頭的舊患又「唻料」了。

今次還要一次過左右腳的膝頭哥同時出現痛症, 我不想再見那個肥屍大隻又寸咀的跌打師父, 但如要睇鐵打骨科又沒有更好的選擇, 所以今次我想試下用意志力「牛」好佢......

應了福無重至的下一句，用了止痛膠布一日, 患處又出現皮膚敏感的症狀, 今次我忍手沒有去R, 四、五天後那痕痒處開始減褪。

一個星期了, 經常有損傷的戰友每日幫我用不同藥膏按摩, 剛過去的周末好像快要好了。但一到要返工的今日, 又再勁痛, 行路一拐一拐又慢到似蝸牛的我, 覺得自己極似一個大肚婆, 我現在最怕是星期五不能穿高踭鞋去看CHIPPENDALES的SHOW, 我還要坐第一排呀, 點可以失禮!